અમેરિકામાં વર્કર્સની અછત
માસ ડિપોર્ટેશનના કારણે ટ્રમ્પ પર વધી રહ્યું છે પ્રેશર?
કોઈ ગુનો ના કર્યો હોય તેવા લગભગ 80 લાખ જેટલા ઈલીગલ ઈમિગ્રન્ટ્સને ડિપોર્ટ કરવાને બદલે લીગલ સ્ટેટસ અપાય તો ઈકોનોમીને જ ફાયદો થાય તેવો તર્ક
અમેરિકામાં ફરી શરૂ થયેલા માસ ડિપોર્ટેશનને કારણે વર્કર્સની અછત વધુ ઘેરી બનતાં હવે બિઝનેસ ગ્રુપ્સ સરકાર પર પ્રેશર વધારી રહ્યા છે. યુએસમાં કામ કરતા 80 લાખ જેટલા અનડોક્યુમેન્ટેડ વર્કર્સને લીગલ સ્ટેટસ આપવા માટે પણ માગ થઈ રહી છે, પરંતુ હાલ સરકાર જરાય મચક આપવા તૈયાર નથી. વોશિંગ્ટન પોસ્ટના એક રિપોર્ટ અનુસાર જુલાઈ મહિનાની શરૂઆતમાં જ DHSના વોશિંગ્ટનમાં આવેલા હેડક્વાર્ટર્સમાં જ આ અંગે એક મિટિંગ થઈ હતી જેમાં ઈમિગ્રન્ટ વર્કર્સ પર નિર્ભર બિઝનેસિસનું પ્રતિનિધિત્વ કરતા અસેન્શિયલ વર્કર ઈમિગ્રેશન કોલિશને ભાગ લીધો હતો. ડોનાલ્ડ ટ્રમ્પે બીજી વાર સત્તા સંભાળી ત્યારબાદ પહેલીવાર આવી કોઈ મિટિંગ થઈ હતી, જેમાં DHSના સેક્રેટરીને બાદ કરતા ICE અને CBPના ઓફિસર્સ હાજર રહ્યા હતા.
આ મિટિંગમાં થયેલી ચર્ચા બાદ DHSના ઓફિસર્સે ઈમિગ્રેશન એન્ફોર્સમેન્ટની પોલિસીમાં કોઈ પ્રકારનો ફેરફાર કરવાનો ઈનકાર કરી દીધો છે, પરંતુ ડિપોર્ટેશન કેમ્પેઈનની બિઝનેસિસ પર શું અસર થઈ રહી છે તેની માહિતી મળતી રહે તે માટે આ પ્રકારની મિટિંગ્સ નિયમિત થતી રહેશે તેવું પણ કહેવાઈ રહ્યું છે. DHSએ આ અંગે કોઈપણ કહેવાનો સાફ ઈનકાર કરી દીધો છે અને જે મેમ્બર્સે તેમાં ભાગ લીધો હતો તેઑ પણ કશું જ બોલવા તૈયાર નથી. ડિપોર્ટેશન ડેટા પ્રોજેક્ટના આંકડા અનુસાર અરેસ્ટ અને ડિપોર્ટ થનારા ઈમિગ્રન્ટ્સનો આંકડો સતત ઉંચો રહેતા એગ્રિકલ્ચર, મેન્યુફેક્ચરિંગ, કન્સ્ટ્રક્શન, હેલ્થ કેર અને એલ્ડર કેર જેવા સેક્ટર્સ સીધી રીતે પ્રભાવિત થયા છે. આ ઉપરાંત મોટેલ્સ અને ગેસ સ્ટેશન્સ ચલાવવા માટે પણ વર્કર્સ ના મળી રહ્યા હોવાથી તેની સાથે સંકળાયેલા લોકો પણ પરેશાન છે.
અધૂરામાં પૂરું ટ્રમ્પ એડમિનિસ્ટ્રેશન હવે ઈલીગલ ઈમિગ્રન્ટ્સને જોબ પર રાખનારા બિઝનેસ ઓનર્સ સામે પણ કડક કાર્યવાહી શરૂ કરવાની તૈયારી કરી રહયું હોવાથી બિઝનેસ ઓનર્સનું ટેન્શન વધ્યું છે. DHSના પૂર્વ સેક્રેટરી ક્રિસ્ટી નોમે તો બિઝનેસ ઓનર્સની આ પ્રકારની ફરિયાદો સાંભળવાનો જ ઈનકાર કરી દીધો હતો, હાલના સેક્રેટરીએ પણ આ મામલે કોઈ ઠોસ આશ્વાસન નથી આપ્યું પરંતુ કમસે કમ તેમણે આ મુદ્દાને સમજવાનો પ્રયાસ ચોક્કસ કર્યો છે. વર્તમાન સેક્રેટરી માર્કવિન મલીન ખુદ એક સમયે પ્લમ્બિંગ કંપની ચલાવતા હતા, જેથી બિઝનેસ ઓનર્સને આશા છે કે તેઓ તેમની ચિંતા પર વિચાર ચોક્કસ કરશે.
જોકે, DHSના પ્રવક્તાએ આ અંગે વોશિંગ્ટન પોસ્ટને આપેલા ઈન્ટરવ્યુમાં એવું જણાવ્યું હતું કે પબ્લિક સેફ્ટી, નેશનલ સિક્યોરિટી અને ઈકોનોમિક સ્ટેબિલિટીને ધ્યાનમાં રાખતા વર્કસાઈટ એનફોર્સમેન્ટમાં કોઈ બાંધછોડ નહીં કરાય. આવું કહી તેમણે કમસે કમ હાલ પૂરતું તો એ સ્પષ્ટ કરી દીધું છે કે ઈલીગલ ઈમિગ્રન્ટ્સને હાયર કરતા લોકો સામે કાર્યવાહી ચાલુ રહેશે અને તેમના બિઝનેસિસ પર રેડ પણ થતી રહેશે. માર્કવિન મલિને હજુ માર્ચ 2026માં જ પોતાનું પદ સંભાળ્યું છે અને હાલમાં જ ઈમિગ્રેશન એન્ફોર્સમેન્ટ દરમિયાન બે ઈમિગ્રન્ટ્સના મોત થઈ જતાં તેઓ ભારે પ્રેશરમાં છે. શૂટિંગ્સ થયા બાદ DHSએ તાત્કાલિક કાર્યવાહી કરતા ટ્રાફિક અટકાવવાના આદેશ આપી દીધા હતા પરંતુ પ્રેસિડેન્ટ ટ્રમ્પે તેને યથાવત રાખવાની સૂચના આપતા DHSને પોતાનો નિર્ણય પાછો ખેંચવો પડ્યો હતો.
માર્કવિન મલિન સામે હવે ચેલેન્જ એ છે કે તેમણે કોઈ બબાલ ઉભી કર્યા વિના ટ્રમ્પ દ્વારા સેટ કરાયેલા ટાર્ગેટને અચીવ કરવા એક મિલિયન એલિયન્સને ડિપોર્ટ કરવાના છે. વ્હાઈટ હાઉસના નિર્દેશ પર ફરી ધરપકડો વધારવામાં આવી છે અને જુલાઈના પહેલા બાર દિવસમાં રોજના એવરેજ 1400 ઈલીગલ ઈમિગ્રન્ટ્સ અરેસ્ટ થયા હતા. જોકે, હવે બિઝનેસ ઓનર્સ ફરી સરકારને આ કાર્યવાહી ધીમી પાડવા માટે પ્રેશર કરી રહ્યા છે. શક્ય છે કે આ પ્રેશરને કારણે જ ટ્રમ્પ એડમિનિસ્ટ્રેશને હાલ હ્યુમેનેટેરિયન પેરોલ પર રહેતા સાત દેશોના ઈલીગલ ઈમિગ્રન્ટ્સનું સ્ટેટસ રદ કરવાની મંજૂરી મળી ગઈ હોવા છતાંય તેમની વર્ક પરમિટ કેન્સલ કરવાની ટાઈમલાઈનને એક્સટેન્ડ કરી છે.
ગયા વર્ષે ટ્રમ્પ એડમિનિસ્ટ્રેશને મોટાપાયે વર્કસાઈટ્સ પર ઈમિગ્રેશન રેડ્સ કરવાનું શરૂ કર્યું હતું જેના પર ખાસ્સો હોબાળો થતાં જૂન 2025માં સરકારે ખેતરો, રેસ્ટોરાં અને હોટેલ્સ પર રેડ નહીં પડે તેવી જાહેરાત કરી હતી, પરંતુ આ રેડ્સ આજે પણ વત્તા-ઓછા અંશે ચાલુ જ છે. જેમકે, સાઉથ ટેક્સસમાં છેલ્લા ત્રણ મહિનાથી કન્સ્ટ્રક્શન સાઈટ્સ પર રેડ થવાનું પ્રમાણ વધી ગયું છે. આ ઉપરાંત સ્ટોર્સ અને ગેસ સ્ટેશન્સ પરથી પણ અનડોક્યુમેન્ટેડ લોકોની ધરપકડ થઈ રહી છે. પોતાનો ટાર્ગેટ પૂરો કરવા માટે એજન્ટ્સ ઈમિગ્રન્ટ્સની વસ્તી વધારે હોય ત્યાંથી અને ટ્રાફિક સ્ટોપ્સ દ્વારા પણ તેમને પકડી જ રહ્યા છે, જેથી બિઝનેસ પર રેડ ના પડે તો પણ ICEની કાર્યવાહીથી ઈમિગ્રન્ટ્સની વર્કફોર્સમાં ચોક્કસ ઘટાડો થઈ રહ્યો છે.
અમેરિકાના બિઝનેસ ઓનર્સ ક્રિમિનલ ઈમિગ્રન્ટ્સને ડિપોર્ટ કરવાની તરફેણમાં છે, પરંતુ તેમની એવી પણ દલીલ છે કે જેમણે કોઈ ગુનો નથી કર્યો તેવા આઠેક મિલિયન અનડોક્યુમેન્ટેડ ઈમિગ્રન્ટ્સને કોઈ પ્રકારે લીગલ સ્ટેટસ આપવું જોઈએ જેથી તેઓ ડિપોર્ટેશનના ડર વિના અમેરિકામાં રહી શકે અને કામ પણ કરી શકે. જોકે, ટ્રમ્પ સરકાર આવી કોઈ રાહતની જાહેરાત કરે તેવી શક્યતા હાલની સ્થિતિમાં તો સાવ ઝીરો લાગી રહી છે. ઉલ્ટાનું સ્ટેટસ વિના રહેતા લોકો માટે હવે તો વર્ક પરમિટ મેળવવાનું અને તેને રિન્યૂ કરાવવાનું પણ ખૂબ જ મુશ્કેલ બનાવી દેવાયું છે.
